Zientzia eta teknologian erreferente diren emakumeak ikusarazten dituen Ada Byron Sariaren edizio berria aurkeztu da

Argitalpen-data: 


      2024_01_25_DSC05860.jpg
  • Nerea Melgosa sailburuak gogorarazi du beharrezkoa dela genero-ikuspegia esparru teknologikoan txertatzea
  • Deialdi honetan, hautagaiek enpresa-munduari egindako ekarpena ere baloratuko da

Nerea Melgosa Berdintasun, Justizia eta Gizarte Politiketako sailburuak Ada Byron Sariaren edizio berri baten aurkezpenean parte hartu du gaur. Zientziaren eta teknologiaren esparruko emakumeak goraipatzen ditu sari horrek. Ada Byron sariaren azken irabazleak izan diren Sara García astronautak eta María José Escalona softwarearen ingeniaritzako espezialistak lagunduta, sariaren edizio berria iragarri da. Hautagaiak aurkezteko epea apirilaren 26an amaituko da.

Melgosak esparru horretan erreferente diren emakumeak egotearen izaera estrategikoa nabarmendu du, "neska gazteek zientziaren mundua berea ere izan daitekeela senti dezaten, beren karrera profesionala garatzeko orduan": "Lanean jarraitu behar dugu, etorkizuneko neskek senti dezaten, hala nahi badute, zientifikoak, matematikoak, astronomoak, fisikoak edo nahi dutena izan daitezkeela, ez dagoela haiei ez dagokien eremurik.

Beren etorkizuna libreki aukeratzearen aldeko mezua jaso dezatela, genero-rol eta -estereotipoek ezartzen dieten mugarik gabe. Baina, horrez gain, urrats ausartak eman behar dira genero-ikuspegia gure bizitzetan hain eragin handia eta garrantzitsua duen eremu horretan integratzeko ".

Sailburuaren hitzetan, "zientziaren eta teknologiaren arloan paradigma-aldaketa bat bultzatu behar dugu, berdintasunerako eta berrikuntzarako aukera-eremu bilaka dadin: Helburua berdintasuna modu sistematikoan txertatzea da, zientziaren eta teknologiaren munduaren ikuskera oraindik androzentrikoa gaindituz".

Hamaikagarren edizio honetatik aurrera, eta hausnarketa estrategiko baten ondoren, batzorde zientifiko-teknologikoak aldaketak egin ditu hautagaien balorazioan, beren karrera profesionalari enpresa-munduan pisu handiagoa emateko. Ildo horretan, enpresaren munduan gauzatu diren erantzukizuneko lanpostuak eta zereginak eta ekarpenak ebaluazio-irizpidetzat hartzen dira, azken balorazioa ikasketa- eta ikerketa-profilak izan duen puntuazioarekin orekatuago egon dadin.

Sariaren babesleak Emakunde, Bizkaiko Foru Aldundia, Danobatgroup eta Innobasque eta Innolab dira.

Informazio gehiago Irekia atarian (Leiho berrian irekiko da)